قصيدة ايوة بغير للشاعر الشاب هشام الجخ

من طرف **Admin** الجمعة سبتمبر 17, 2010 10:01 am

ايوه بغير
لا أنا نقصان ولا ضعفان
ولا مسطول ولا سكران
ولا زايغ من عيني الضي
ولا حد أحسن مني فى شي
بس بغير
واللى قالولك غيرة الراجل
قلة ثقه أو قلة فهم
خلق حمير

غيرة الراجل
نار فى مراجل
نار بتنور مابتحرقش
واحنا صعايده منستحملش
طبعنا حامى
ودمنا حامى وشمسنا حاميه
واللى تخلى صعيدى يحبها
يبقى ياغلبها

اصلنا ناس على قد الطيبه
كلنا هيبه
والنسوان فى بلدنا جواهر
طب لو عندك حتة ماس
هتخليها مداس للناس
ولاه هتقفلي اوضه عليها
بميت ترباس
يمكن حتى تأجري ليها جوزين حراس

يبقى لا أنا غفلان ولا جهلان
كل الفرق ما بينى وبينك
انى صعيدى
ينعل أبو دا اليوم الأكحل
اللى طلعت لقيتنى صعيدى

لو كان بيدى
كنت أعملك هندى بريش
واقلب شعري كنيش كرانييش
والبسلك سلسله متدلدله
خرزه وقلب
بس ازاى البسلك سلسله
هو أنا كلب

ثم العبره مهيش في اللبس
أصل المشكله
مش في اللبس
أصل المشكله عندك
عندك
قلت هسيبها وبكره تحس
بعده تحس
بعده تحس
ده أنا لو جبس
كنت زعقت

ماشى صداقه
وماشى زماله
بس ماجتش على الرجاله
ماهى نسوان الدنيا كتير
وأنا مابقولش تخاصمي الناس
ولا تتحجبي عن الرجالة
ولا تعتكفي و تسكني دير
بس ياريت حبة تقدير

إنى بحبك وإنى بريدك
وإني زرعت حياتي في ايدك
وإني غزلت بنات الدنيا
عقود على جيدك
وإني تعبت من التفكير
وإنى بغير